Адыгэ Республикэм и Президентэу ТхьакIущынэ Аслъан икабинет бэмышIэу ригъэблэгъэгъагъэх Адыгэ Республикэм и Премьер-министрэу КъумпIыл Мурат, Адыгэ Республикэм физическэ культурэмрэ спортым­рэкIэ и Комитет итхьаматэу Хьасаныкъо Мурат, Адыгэ Республикэм икъэралыгъо учреждениеу «Стройзаказчик» зыфиIорэм ипащэу Абрэдж Аслъан.

БлэкIыгъэ илъэсым ибжыхьэ къалэу Мыекъуапэ иста­дион игъэкIэжьын рагъэ­жьэгъагъ, ащ епхыгъэ Iоф­шIэнхэр зэрэкIохэрэм ыкIи ахэр зыщаухыщтхэм мы зэ­IукIэгъум щатегущыIагъэх. Проект-сметнэ документациехэм атетэу пстэумкIи стадионым игъэкIэжьын со­мэ миллион 460-рэ пэIу­хьащт. Ащ ипроцент 20-р республикэ бюджетым къы­хэкIыщт. Мы объектыр гухэлъ гъэнэфагъэ зиIэ федеральнэ программэм зэрэха­гъэхьагъэр шъугу къэтэгъэ­кIыжьы.

КъумпIыл Мурат республикэм ипащэ зэрэриIуа­гъэм­кIэ, стадионым игъэкIэжьын сомэ миллион 80-м ехъу пэ­Iуагъэхьэгъах.

ЗэIукIэгъум зэрэ­щыха­гъэу­­нэфыкIыгъэмкIэ, стадионым игъэкIэжьынкIэ охътэ кIэкIым къыкIоцI Iоф­шIэн­хэр зэкIэ аухынхэу республикэм амалхэр IэкIэ­лъых.

- Охътэ кIэкIым къы­кIоцI республикэ стадионым ишIын тыухыным ткIуачIэ етхьылIэн фае, - хигъэу­нэфыкIыгъ ТхьакIущынэ ­Аслъан. - Ащ епхыгъэу спортымкIэ федеральнэ пащэхэм зафэд­гъэзэн, псэолъэ­шIын Iоф­шIэнхэр гъэпсын­кIэгъэнхэм пае мы илъэсым нахьыбэу ахъщэ къатIуп­щынэу ахэм тялъэIун фае.

Мы мэфэ дэдэм Адыгэ Республикэм и Президентэу ТхьакIущынэ Аслъан Урысые Федерацием спор­тым­кIэ, туризмэмкIэ ыкIи ныб­жьыкIэ политикэмкIэ ими­нистрэу Виталий Мутко телефонкIэ дэгущыIагъ. Мы охътэ благъэм республикэ стадионыр ипIалъэм къыпэу гъэцэкIэжьыгъэнымкIэ ыкIи нахьыбэу мылъку къыфы­хэгъэкIыгъэнымкIэ амалэу щыIэхэм атегущыIагъэх. Ащ нэмыкIэу бассейн зыхэтыщт, япсауныгъэ зыщагъэ­пытэщт физкультурэ гупчэм ишIын пае мылъкур къызэ­ратIуп­щыщтым ехьылIэгъэ Iофы­гъоми тегущыIагъэх. Зигъэ­псын сомэ миллиони 144-рэ пэIухьащт гупчэм ­ипроект-сметнэ документацие агъэхьазырыгъах. Стадионым пэблагъэу ар ашIы­нэу рахъу­хьэ. Виталий Мутко Адыгеим ипащэ къызэ­ригъэ­гугъа­гъэмкIэ, мы Iо­фы­гъохэмкIэ республикэм илIыкIохэм зэзэгъыныгъэхэр адишIынхэм ар фэхьазыр.

Адыгэ Республикэм
и Президент
ипресс-къулыкъу