Адыгэ Республикэм и Премьер-­министрэу КъумпIыл Мурат республикэм бэмышIэу щызэхащэгъэ пред­прия­тиитIумэ - ОАО-у «Южгаз­строй» зыфиIорэмрэ бетон пкъыгъохэр къыдэзыгъэкIырэ заводэу ООО-у «Время» зыфиIорэмрэ ты­гъуасэ ащы­Iагъ.

Адыгэ Республикэм и Премьер-­министрэ игъусагъэх Адыгэ Республикэм псэолъэшIынымкIэ, транспор­тымкIэ, унэ-коммунальнэ, гъогу хъыз­мэтымкIэ иминистрэу Валерий Картамышевыр. ОАО-у «Южгазстрой» зыфиIорэм  зыщэIэм, КъумпIыл Мурат полиэтилен трубэхэр къыдэзы­гъэ­кIырэ заводым иапэрэ линие нэIуасэ зыфишIыгъ. Китаим къыщащэфыгъэ оборудованием сомэ миллион 20 фэдиз тефагъ.

ОАО-у «Южгазстрой» зыфиIорэм игенеральнэ директорэу Андрей Тугулуковым КъумпIыл Мурат къызэрэ­фи­IотагъэмкIэ, заводым ипродукцие ЖКХ-м иотраслэ пстэуми, газрыкIуа­пIэхэм яшIынкIи жъугъэу къызыфа­гъэфедэн алъэкIыщт. ОАО-у «Южгазстрой» зыфиIорэм непэ ехъулIэу нэбгыри 100 фэдизмэ Iоф щашIэ. Блэ­кIыгъэ илъэсым ахэм сомэ миллиони 105-рэ зытефэрэ псэолъэшIын-монтажнэ IофшIэнхэр агъэцэкIагъэх. Къихьащт илъэсым заводым иятIонэрэ, иящэнэрэ линиехэр атIупщынэу ра­хъухьэ.

Адыгэ Республикэм и Премьер-­министрэ предприятием зыщэIэм, газ­рыкIуапIэхэмрэ псырыкIуапIэхэмрэ агъэтIылъыхэ зыхъукIэ агъэфедэн алъэ­кIыщт агрегатыкIэм нэIуасэ зы­фишIыгъ.

ООО-у «Время» зыфиIорэм зэкIом, КъумпIыл Мурат псэолъапхъэхэу мыщ къыщыдагъэкIыхэрэм ыкIи республикэм имызакъоу, Урысыем и Къыблэ инэмыкI регионхэм ащыIуа­гъэкIыхэрэм нэIуасэ зафишIыгъ. Предприятиер къызызэIуахыгъэр мэ­зитIу ныIэп зэрэхъугъэр, ау а уахътэм къыкIоцI псэолъапхъэхэм якъыдэгъэ­кIынкIэ республикэм ипредприятие пэрытхэм ясатыр хэуцуагъ.

КъумпIыл Мурат зэрэхигъэунэ­фы­кIыгъэмкIэ, къэралыгъом иэкономикэ чIыпIэ хьылъэ зыщит лъэхъаным мыщ фэдэ предприятиехэм Iоф ашIэу зэраублагъэм республикэмкIи, Уры­сыемкIи мэхьанэшхо иI.

- Мы хъугъэ-шIагъэхэм мэхьанэ­шхо яI, Адыгеим иэкономикэ хэхъоныгъэ зэришIырэр ахэм къагъэлъагъо, - къыIуагъ ащ. - Республикэм иIэшъхьэтетхэр джырэ технологиехэр зыгъэфедэрэ инвестиционнэ проект-
хэм япхырыщынкIэ адеIэщтых.

Адыгэ Республикэм и Президент ипресс-къулыкъу