«Динамо» Мыекъуапэ - «Орел ГТУ - Олимп» Орел хэку - 82:69 (31:24, 26:12, 16:20, 9:13).

Мэзаем и 2-м Мыекъуапэ щы­зэ­IукIагъэх.

Зезыщагъэхэр: А. Андреев - Пятигорск, В. Жак - Ростов-на-Дону, А. Компанищенко - Азов.

«Динамо»: Барсуков - 2, Пепеляев - 14, Хмара - 11, Иванов - 9, Долгополов - 19, Тыу - 8, Гапошин - 11, Блэгъожъ, Степанов - 2, Хьакъун - 6.

Мыекъопэ «Динамэр» щит лъапсэм нахь дэгъоу щешIагъ. Тиспортсменхэр Iэ­гуаом фэбанэхэ зыхъукIэ хьакIэхэр чIы­пIэ къин радзэщтыгъэх. Щитым пэмычы­жьэу щыкIорэ ешIэгъу уахътэр бысымхэм дэгъоу агъэфедэщтыгъ. Ухъумэн Iоф­хэр щысэ тепхынэу Александр Степановым ыгъэцакIэщтыгъэх. Баскетболист ныбжьыкIэм гуетныгъэ хэлъэу Iоф зыдишIэжьмэ, иIэпэIэсэныгъэ хигъэхъощт.

Опыт ин зиIэ Сергей Ивановыр та­къикъ 23-рэ ныIэп зэрешIагъэр. Арэу щытми, текIоныгъэм икъыдэхын иIахьы­шIу хишIыхьагъ. Тыу Георгий псынкIэу гупшысэзэ Iэгуаор къаIэкIихэу, хъурджанэм дахэу ридзэу зэп зэрэтлъэгъугъэр. Андрей Долгополовыр щит чIэгъым пхъашэу зэрэщыбанэрэр къетэжьыгъ, очко 19 къытфихьыгъ. Илья Хмарэ анахьыбэрэ ешIапIэм итыгъэмэ ащыщ, баскетболист цыхьэшIэгъу. Хьакъунэ Руслъан, Сергей Барсуковым, Артем Гапошиным зэхэщэн Iофхэр зэрагъэцакIэрэм уигъэрэзэнэу щытыгъ.

Мы сатырхэм спортыр зикIасэхэр ­яджэхэ зыхъукIэ «Динамэр» Орел икоман­дэ ятIонэрэу зэрэдешIагъэм тэ тыщы­гъо­зэщт. ПэшIорыгъэшъэу хэтэгъэунэфыкIы хьакIэхэм очкоуищ дзыгъохэр дэгъоу зэ­рагъэцакIэхэрэр. Роман Плясовым гъого­гъуи 5, Артур Усковым гъогогъуи 4 щитым пэчыжьэхэу хъагъэм Iэгуаор ра­дзагъ. ЯтIонэрэ зэIукIэгъур хьылъэу кIощт­ми, «Динамэм» къыхьын фаеу тэлъытэ.

Сурэтым итыр: «Динамэр» Орел икомандэ дешIэ.