КIэлэцIыкIухэмрэ ныбжьы­кIэхэм­рэ декоративнэ-прикладной ис­кусствэмкIэ язэнэкъокъухэу Адыгэ Республикэм культурэмкIэ и Мини­стерствэрэ АР-м культурэмрэ искусствэмрэ­кIэ иеджапIэхэм МетодикэмкIэ якабинетрэ зэхащэгъэ зэнэкъокъум зэхахьэм къыщыте­гущыIагъ БжьэшIо Фатимэ. ЕджапIэхэм Ме­то­дикэмкIэ якабинет Ф. БжьашIор зэрипащэр къыдилъытэзэ, сурэтышIхэм яIофшIагъэ осэ ин фишIыгъ. Адыгэкъалэ, Мыекъуапэ, Инэм, Яблоновскэ, Тульскэм, Натырбые, Кощхьаблэ, Гъобэкъуае, Красногвардейскэм, Джаджэ, Тэхъутэмыкъуае, Каменномост­скэм якIэлэеджакIохэм, искусствэхэмкIэ Адыгэ республикэ колледжым, Адыгэ къэралыгъо университетым искусствэхэмкIэ иинститут ястудентхэмрэ кIэлэегъаджэхэмрэ яIэшIагъэ­хэмкIэ щыIэныгъэм ухащэ ашIоигъу.

- Илъэ­­ситIум къыкIоцI зэнэкъокъухэр зэ зэхэтэщэх, - еIо АР-м исурэтышIмэ я Союз итхьаматэу Хъуажъ Рэмэзанэ. - Искусствэм хэщэгъэ ныбжьыкIэхэм яшIэныгъэ ха­гъахъо. Къалэм дэсхэмрэ къуаджэм щы­псэурэ кIэлэеджакIохэмрэ яамалхэр зэрэзэфэмыдэхэр къыдгурэIо. Сэнаущыгъэу ахэ­лъыр къызэIуахыным фэшI къалэм иныб­жьыкIэхэм кIэлэегъаджэу, сурэтышIэу уп­чIэжьэгъу ашIын алъэкIыщтыр нахьыб.

КIэлэегъаджэм кIэлэеджакIор зэрэкIыры­плъырэм мэхьэнэ ин Хъуажъ Рэмэзанэ реты. ЗэлъашIэрэ сурэтышIэу ГъукIэ Замудин ыгъа­сэрэмэ япIуаблэхэм гур зыфащэ. Уджыхъу Эльдарэ ипIуаблэ IофшIэгъэ анахь дэгъумэ ащыщ. Нэхэе Аскэри пIуаблэр зэри­шIыгъэм уегъэгушхо.

Дышъэ идыкIынхэр зэкIэми дэгъоу афэ­гъэ­псырэп. ЛIыIужъу Аминэт хэхъоныгъэхэр зэришIыщтхэм уицыхьэ тебгъэлъы хъущт. Апчымрэ гипсымрэ псэушъхьэхэр ахишIыкIыгъ искус­ст­вэхэмкIэ Адыгэ республикэ колледжым истудентэу Быжь Азэмат. Екатерина Берславцевам кум кIашIэрэ шыр къэгущыIэщтым  фэдэу ышIыгъ.

Натырбые икIэлэ­еджэ­кIо куп унэр, щагур, нэмыкIхэри сурэт­хэмкIэ къегъэлъагъох. Унэм итеплъэ щыкIа­гъэ­хэр фэолъэгъухэми, къоджэ псэукIэр нэгум къыкIэуцо. Псынэр, псэу­шъхьэхэр, чъыгхэр, къуашъор, нэмыкIхэри къэгъэлъэгъоным хэолъагъох, ижъырэ щагум удэхьагъэм фэдэу олъытэ.

Адыгэ пшысэмэ атехыгъэ IофшIагъэхэр Яблоновскэм щыщхэм «къагъэгущыIэхэуи» къыпщэхъу, сурэтхэр псэ апытым фэдэх. Хьа­джымэ Фатимэ ущытхъуныр къылэ­жьыгъ. Гъобэкъуаехэу Тхьаркъохъо Иринэрэ Тхьаркъохъо Аминэтрэ ядышъэ идыкIынхэр дахэх, лъэпкъ гупшысэ ахэлъ. Телефоныр чIэ­мынэным, къепхьакIыным фэшI хэды­кIынэу ашIыгъэр къыпшъхьапэн ылъэкIыщт. Абрэдж Асыет иIофшIагъэ хагъэунэфы­кIыгъ. Дунаир, тыкъэзыуцухьэрэ пкъыгъохэр сурэтхэм-
кIэ къеIуатэ. ЩыIэныгъэм фэлэжьэнхэм нахь  къыфегъэущых.

Екатерина Языковар Джаджэ щеджэ. Дунаим идэхагъэ сурэтхэмкIэ къыриIоты­кIы­гъэу къэбархэр къытфиIотагъэх. Зэнэкъо­къу­хэм зэрахэлэжьагъэр IофшIэгъэ дэгъукIэ зы­фе­лъытэжьы.

КIэлэцIыкIухэмрэ ныбжьыкIэхэмрэ шIэжь яIэным, япатриотическэ пIуныгъэ гъэлъэшыгъэным афэшI сурэтхэм якъэгъэлъэгъон щыIэныгъэм епхыгъэу къытаIуагъ искусствэм щыцIэрыIохэ Бырсыр Абдулахьрэ Лэу­пэкIэ Нурбыйрэ.