УФ-м ивице-премьерэу Александр Жуковым тыгъуасэ видеоконференцие зэхищагъ. Непэрэ мафэхэм яхъулIэу IофшIапIэ зымыгъотыхэрэм алъэныкъокIэ Iофхэм язытет зэгъэшIэгъэным, гумэкIыгъоу къэуцухэрэр дэгъэзыжьыгъэнхэм апае зэшIохыгъэн фаехэм Iофтхьабзэр афэгъэхьыгъагъ. Ащ хэлэжьагъ Адыгэ Республикэм и Президентэу ТхьакIущынэ Аслъан.

Александр Жуковым къызэрэ­хигъэ­щыгъэмкIэ, экономикэ кризисым цIыкIу-цIыкIоу къэралы­гъор къыхэкIыжьы. Арэу щыт
нахь мышIэми, IофшIапIэ зымы­гъотыхэрэм алъэныкъокIэ Iофхэм язытет уигъэрэзэпэнэу щытэп. Джырэ лъэхъан IофшIапIэ зимыIэу Урысыем щагъэунэфыгъэхэм япчъагъэ нэбгырэ миллиони 6,2-рэ мэхъу, 2010-рэ илъэсыр къызихьа­гъэм къыщегъэжьагъэу а пчъа­гъэм джыри нэбгырэ мин 35-рэ фэдиз къыхэхъуагъ. 2009-рэ илъэсыр пштэмэ, мы категорием хэхьэрэ цIыфхэм IэпыIэгъу афэхъугъэным пае сомэ миллиард 38-м ехъу субъектхэм афатIупщыгъ, ащ щыщэу агъэфедагъэр сомэ миллиард 33,4-рэ мэхъу. Федеральнэ про­граммэм дакIоу субъектхэм аща­штэгъэ программэхэм яшIуагъэкIэ, кризисыр къэмысызэ IофшIапIэ зэ­рагъэгъотыгъэ цIыфхэм япчъагъэ, блэкIыгъэ илъэсым егъэпшагъэмэ, фэдитфыкIэ нахьыбэ ашIын алъэ­кIыгъ. Джащ фэдэу предпринимательствэ цIыкIум зегъэушъомбгъу­гъэным пае федеральнэ гупчэм къытIупщыгъэ сомэ миллиарди 7-м ехъурэр зищыкIагъэм пэIуа­гъэ­хьагъ. Къыблэ федеральнэ шъо­лъырыр пштэмэ, нэбгырэ мин 30-м ехъумэ ежь яIофшIапIэхэр къызэIуахынхэ алъэкIыгъ. Программэхэр тэрэзэу гъэфедагъэхэ хъумэ, кIэух дэгъухэр къатынхэ зэ­ралъэкIыщтыр мы щысэм дэгъоу къегъэлъагъо. Ау IофшIапIэ зымыгъотэу Урысыем исыр джыри зэрэмымакIэр А.Жуковым къы­хи­гъэщызэ, ахэм яфэIо-фашIэ-
хэр зэ­шIохыгъэ хъунхэр пшъэрылъ шъхьа­­Iэу зэрэщытыр къыгъэнэфагъ.

- УФ-м и Президентэу Дмитрий Медведевым сызыIокIэм анахьэу сынаIэ зытезгъэтын фэе лъэныкъоу къысфигъэнэфэгъагъэр IофшIапIэ зымыгъотыхэрэм япчъа­гъэ нахь макIэ шIыгъэныр ары, - къыIуагъ зэфэхьысыжьхэр къы­шIызэ ТхьакIущынэ Аслъанэ. - А лъэхъаным IофшIапIэ зимыIэхэм япчъагъэ проценти 4,4-рэ хъущты­гъэмэ, джы ар проценти 2,5-м нэс къедгъэIыхын тлъэкIыгъэ. УФ-м исубъектхэр пштэхэмэ, тиреспубликэ закъу ары лэжьапкIэмкIэ чIы­фэ зытемылъыгъэр, а лъэныкъор та­пэкIи гъэпытэгъэным тынаIэ тетэгъэты. АщкIэ Адыгеим иIофхэм язытет уигъэрэзэнэу щыт нахь мышIэми, ащ тыкъыщымыуцоу ыпэкIэ тылъыкIотэн гухэлъ тиI. IофшIапIэ зымыгъотырэ процен­титIум къыхиубытэрэ нэбгырэ пэпчъ тынаIэ тедгъэтын фае.

АР-м и Премьер-министрэ игуа­дзэу Алексей Петрусенкэм къы­зэриIуагъэмкIэ, IофшIапIэ зимы­Iэ­хэу республикэм щыпсэухэрэм IэпыIэгъу афэхъугъэным пае 2009-рэ илъэсым федеральнэ бюджетым сомэ миллиони 117,7-рэ, республикэ бюджетым сомэ миллиони 6-м ехъу къатIупщыгъ ыкIи а зэ­кIэри агъэфедагъ. АР-м и Президентэу ТхьакIущынэ Аслъан уна­шъоу ышIыгъэм диштэу кризисым илъэхъан цIыфыбэ зыщылэжьэрэ предприятиехэм, органи­зациехэм IэпыIэгъу афэхъугъэныр АР-м и Правительствэ ипшъэрылъ шъхьаIыгъ. Общественнэ IофшIэн­хэм, ежь иIофшIапIэ къызэIузыхы зышIоигъохэм, сэнэхьатыкIэ зэзы­гъэгъотынэу фаехэм, нэмыкI лъэныкъохэми апэIухьан фэе ахъщэр икъу фэдизэу аIэкIагъэхьагъ. 2010-рэ илъэсым а IофшIэныр джыри республикэм щылъагъэ­кIотэщт. Агъэнэфэгъэ программэхэр щыIэныгъэм щыпхырыщы­гъэнхэм пае тызыхэт илъэсым федеральнэ гупчэм сомэ миилиони 114,9-рэ, республикэ бюджетым сомэ миллион 14,5-рэ къатIуп­щыщт. А пчъагъэр джыри нахьыбэ ашIын гухэлъ яI. Къыхэгъэщы­гъэн фае къэралыгъо IэпыIэгъу къызэратыхэу, IофшIэпIакIэ къы­зэIузыхырэ предпринимательхэм ежьхэм анэмыкIэу IофшIапIэ зэра­гъэгъотырэ нэбгырэ пэпчъ телъытагъэу ахъщэ IэпыIэгъу къэралы­гъом къызэрафитIупщыщтыр.

Зигугъу къэтшIыгъэ программэм игъэцэкIэн 2010-рэ илъэсым ищылэ мазэ республикэм щыра­гъэжьагъ.

ТХЬАРКЪОХЪО Адам.

Сурэтхэр А. Гусевым къытырихыгъэх.