Адыгэ Республикэм шахматхэмкIэ изэнэкъокъухэр Мыекъуапэ щыкIуагъэх. Адыгэ къэралыгъо университетым щызэхащэгъэ зэIукIэгъухэм ахэлэжьэгъэ ешIакIохэр купитIоу гощыгъагъэх. Апэрэ чIыпIэр Александр Кадилиным къыдихыгъ.

АР-м физкультурэмрэ спортымрэкIэ и Комитет зэхищэгъэ зэнэкъокъухэм зыныбжь хэкIотагъэхэри, кIэлэеджакIохэри ахэлэжьагъэх. ЗэIукIэгъуи 9-м очкоуи 7,5-рэ къащихьи, Александр Кадилиныр ящэнэрэу АР-м ичемпион хъугъэ. Виктор Кашлевым очкоуи 7 къыхьи, ятIонэрэ хъугъэ. Юрий Мешалкиным очкоуи 6 иIэу ящэнэрэ чIыпIэр къыдихыгъ, Николай Удовиченкэм яплIэнэрэ чIыпIэр ыхьыгъ.

ЯтIонэрэ купым шахматист ныбжьыкIэу Артем Арютюновым апэрэ чIыпIэр къыщыдихыгъ, очкоуи 8 ащ ригъэкъугъэр. ГъукIэлI Долэти очкоуи 8 къыхьыгъ, ау ащ ятIонэрэ чIыпIэр фагъэшъошагъ. Борис Шавриным ящэнэрэ чIыпIэр ыхьыгъ.

ХагъэунэфыкIырэ чIыпIэхэр къыдэзыхыгъэмэ щытхъу тхылъхэр, нэпэеплъ шIухьафтынхэр афагъэшъошагъэх. Анахь дэгъоу ешIагъэхэр Урысыем и Къыблэ шъолъыр изэнэкъокъухэм ахэлэжьэщтых.

Сурэтыр зэнэкъокъум къыщытырахыгъ.