Краснодар краим футболымкIэ икIымэфэ зэIухыгъэ зэнэ­къо­къухэм 1995 - 1996-рэ илъэсхэм къэхъугъэ кIалэхэр ахэлажьэх. Адыгэ Республикэм футболымкIэ и СДЮСШОР зыщызыгъасэхэрэм яухьазырыныгъэ хагъэхъоным фэшI гъунэгъу краим икомандэхэм адешIэх. НыбжьыкIэхэм яIэпэIэсэныгъэ зыкъызэриIэтырэм тегъэгушIо, ау сэнаущыгъэ зыхэлъ футболистхэр Краснодар, Тольятти, нэмыкI къалэхэм зэрара­гъэблагъэхэрэм лъэшэу тегъэгумэкIы.

Мыекъопэ футбол командэу «Зэкъошныгъэм» илъэсыбэрэ щешIагъэмэ ащыщ Александр Пахомкиныр. Джырэ уахътэ кIэлэцIыкIу тренерэу республикэ футбол еджапIэм Iоф щешIэ. Пэщэныгъэ зыдызэрихьэрэ командэр Краснодар краим изэнэкъокъухэм дэгъоу ащешIэ. Мыекъуапэ икомандэу Юрий Манченкэм Iоф зыдишIэрэм - 3:1-у, Шытхьалэ ифутболистмэ - 6:0-у, Апшеронскэ щыщ кIалэхэм - 4:0-у, Тульскэм икомандэ 2:0-у А. Пахомкиныр зипащэр атекIуагъ.

- Апэрэ чIыпIэр купым къыщыдэзыхыгъэр краим икIэух зэIукIэгъумэ ащешIэщт. Александр Пахомкиныр зипэщэ командэм бэкIэ тыщэгугъы, - еIо АР-м футболымкIэ и СДЮСШОР изавучэу Пэнэшъу Мыхьамодэ. - Сэнаущыгъэ зыхэлъ футбо­листхэр ащ егъасэх.

- ЕгъашIэм тызыкIэхъо­псы­щтыгъэр джы къыддэхъугъ, - зэдэгущыIэгъур лъегъэкIуатэ Адыгеим ифутбол иветеранэу Александр Пахомкиным. - Илъэс реным футбол тызыще­шIэн тлъэкIыщт стадион тиIэ хъугъэ. НыбжьыкIэмэ яхэгъэгу зэнэкъокъухэр щызэхэпщэнхэ плъэкIыщт. Ащ пае Адыгэ Республикэм иIэшъхьэтетмэ лъэ-
шэу тафэраз. ТызщешIэщт стадионым тылъыхъунэу гъогу чыжьэ тытехьажьырэп. Гъунэгъу шъолъырхэм якомандэхэр Мые­къуапэ къедгъэблэгъэнхэу къы­тэлъэIух.

Исэнэхьат хэшIыкI фызиIэ тренерым къэбар дэгъухэр къеIуа­тэ­хэми, ынэгу гушIуагъо кIэс­-
лъа­гъо­щтыгъэп. ГумэкIыгъомэ «алъа­хъэрэм» фэзгъэдагъ.

- Адыгэ Республикэм къэралыгъо гъэпсыкIэ иI, гъэ­хъагъэу ышIырэмэ тарэгушхо, - игупшысэхэм тащегъэгъуа­зэ Александр Пахомкиным. -Адыгеим ыцIэ спортышхом нахь лъагэу щытIэты тшIои­гъу. ТиIофшIэн дэгъоу зэрэзэхэтщэщтым тыпылъ шъхьае, гушIуагъоу хэдгъуатэрэр макIэ. Тифутболист анахь дэгъухэр нэмыкI командэхэм арагъэблагъэх. Тэ пкIэнчъэу гуетыныгъэ тхэлъэу Iоф тшIэу къытщагъэхъу. Илъэс заулэ зытешIэкIэ, тэ дгъэсэгъэ кIалэхэм ащыщхэр мыекъопэ «Зэкъошныгъэм» щытлъэ­гъунхэ тлъэкIыщтгъэ...

Владислав Кондрашовыр гупчэм щешIэ, Роман Пышновымрэ Натхъо Амиррэ ыпэкIэ щешIэх. В. Кондрашовымрэ
Р. Пышновымрэ Краснодар испорт еджапIэ аштагъэх. А. На­тхъор футболымкIэ лъэпкъ академиеу Тольятти дэтым щеджэ. Бгъэсэрэ кIалэр командэ лъэшым рагъэблагъэмэ урыгушхощт, ау уиреспубликэ гупсэ щебгъашIэ пшIоигъо зыхъукIэ, упчIэмэ къахэхъо.

Къагъэзэжьынэу къытщэхъуа?

ЯцIыкIугъом Мыекъуапэ дэ­кIыгъэ кIалэхэм «Зэкъошны­гъэм» къагъэзэжьэу бэрэ къыхэ­кIырэп. Роман Чижовым, Къонэ Амир, Константин Лимаревым, нэмыкIхэми Къыблэ шъолъырым икIэлэцIыкIу командэмэ ятренерхэр къалъэплъэх. Бэ темышIэу ахэри рагъэблэгъэнхэкIи пшIэ­хэщтэп.

Тумэ ТIахьири футболыр икIас. Iэгуаор ипIэшъхьагъэу хэчъыежьэуи къыхэкIы. Урысыем, дунаим ащыцIэрыIо футболистхэр псынкIэу къепчъых. Нэбгырэ тхьапша Тумэ ТIахьир фэдэу спорт еджапIэм зыщызыгъасэрэр?!

Тренерэу Александр Вольвач ыгъэсэрэ кIалэхэр Краснодар краим, Адыгэ Республикэм ячемпионых. Вячеслав Кутузовыр, Дмитрий Швалевыр, Роман Дроменкэр, Джабраил Кадиевыр Краснодар икомандэхэм ашта­гъэх.

Адыгеим щапIугъэ кIалэхэм республикэм сыда къызыкIа­гъэзэжьыщтыр? Шъыпкъэ, якъа­лэ шIу алъэгъу, яIахьылхэр щэпсэух, ау спорт еджапIэу, командэу джы зыдэщыIэхэм яфэIо-фашIэхэр нахьышIоу ащагъэ­цакIэх, зэнэкъокъухэм нахьыбэрэ ахэлажьэх, яIэпэIэсэныгъэ хагъэхъоным фэшI амалышIухэр яIэх. ЕтIани пшъэрылъ ин зыфэзыгъэуцурэ командэхэм арагъэблэгъэнхэм пае ащ фэдэ еджа­пIэхэм защыбгъэсэныр нахьышIу.

Спорт интернат тIорэп

Футбол ешIапIэхэр АР-м щагъэпсых, ар гушIуагъо. ГуIэн IофкIэ спорт интернат Мые­къуапэ къыщызэIуахын фаеу тIорэп. ЖьыIо, тыфэхьазырэп. Арэу щытми, спорт классхэр нахьыбэу тиIэнхэ тлъэкIыщтба? Тренер-кIэлэегъаджэхэр Адыгеим иIэх, къэкIощт уахътэм те­лъытагъэу тренерэу рагъэджэнхэ алъэкIыщтхэри къагъоты­щтых. Iофым зэхэщэкIо дэгъухэр ищыкIагъэх.

Мыекъуапэ республикэ ста­дио­ныкIэ щашIы. Ащ диштэу футбол командэу «Зэкъошны­гъэри» нахьышIоу ешIэн, апэрэ купым зэрэхэхьажьыщтым егупшысэн фае. Икъущт ауж къинэрэмэ «Зэкъошныгъэр» зэрахэтыгъэр. Тифутбол командэ дэ­гъоу ешIэ, нахьыбэрэ тигъэгушIо зыхъукIэ, стадионым кIорэ цIыфмэ япчъагъэ хэпшIыкIэу хэхъощт.

ТхакIом игупшысэхэм уагъэрэхьатырэп

Адыгэ Республикэм итхэкIо цIэрыIомэ ащыщ джырэблагъэ гущыIэгъу тыфэхъугъ. СССР-м изаслуженнэ тренерэу Кобл
Якъубэ фэгъэхьыгъэ тхыгъэхэу, спортымрэ пIуныгъэмрэ яхьы­лIэгъэ къэбархэу «Адыгэ ма­къэм» къыхиутыгъэмэ ар
яджагъ. Ащ фэдэ темэхэр цIыф­мэ ящыкIагъэхэу елъытэ.

Автомобиль гъогухэм нэбгырабэ зэратекIуадэрэм, ныбжьы­кIэхэр шъон пытэхэм апыщагъэ зэрэхъухэрэм, IофшIэн гъэнэфагъэ зэрямыIэр телъхьапIэ ашIызэ, яфэшъошэ чIыпIэ щыIэныгъэм зэрэщамыубы­тырэм, нэмыкIхэми тхакIор агъэгумэкIы. Культурэм, искусствэм, спортым яшIуагъэкIи щыкIагъэу тиIэхэр нахь IэшIэхэу дэдгъэзыжьынхэ тлъэкIыщтэу елъытэ.

Адыгеир чIыпIэ дахэ щэпсэу. Лъэпкъэу исхэр щызэгурэIох, язэпхыныгъэхэр щыIэныгъэм щагъэпытэх. Адыгэ Республикэм ибыракъ, инэмыкIырэ къэралыгъо тамыгъэхэр яспорт шъуа­шэхэм атедзагъэхэу зэнэкъо­къумэ ахэлажьэх. Тыфай тапэкIи АР-м ыцIэ дунаим дахэкIэ щагъэIунэу, щытхъоу къытфа­хьырэм ямедальхэмкIэ, рекорд­хэмкIэ хагъэхъонэу.

Сурэтым итхэр: Александр Пахомкиным ыгъэсэрэ кIа­лэхэр стадионэу «Юностым» футбол щешIэх.