ЩынэгъончъэнымкIэ Советэу АР-м и Президент дэжь щызэхащагъэм тыгъуасэ, мэзаем и 2-м, зэхэсыгъоу иIагъэм тхьамэтагъор щызэрихьагъ АР-м и Президентэу ТхьакIущынэ Аслъан. Зэхэсыгъом хэлэжьагъэх АР-м и Премьер-министрэу КъумпIыл Мурат, АР-м и Президентрэ министрэхэм я Кабинетрэ я Администрацие ипащэу Александр Пиценкэр, федеральнэ инспектор шъхьаIэу ЛIыIужъу Адамэ, АР-м и Апшъэрэ Суд и Тхьаматэу Трэхъо Аслъан, правоохранительнэ къулыкъу зэфэшъхьафхэм, муниципальнэ гъэпсыкIэ зиIэ район ыкIи къэлэ ­администрациехэм япащэхэр, Правительствэм хэтхэр.

Советым изичэзыу зэхэсыгъо зыфэ­гъэхьыгъагъэр зыныбжь имыкъугъэу бзэ­джэшIагъэ зезыхьэхэрэм яIофыгъо­хэр ары. АщкIэ Iофхэм язытет пстэумэ апэу къытегущыIагъэх Премьер-министрэм игуадзэу Алексей Петрусенкэмрэ хэгъэгу кIоцI IофхэмкIэ минист­рэу Александр Сысоевымрэ. Мыхэм къызэраIуагъэмкIэ, 2009-рэ илъэсым пстэумкIи бзэджэшIэгъи 168-рэ зыныбжь имыкъугъэхэм Адыгеим щызэрахьагъ. 2008-рэ илъэсым егъэпшагъэ­мэ, ар 10-кIэ нахь макIэ хъугъэ. Ау мыщ дэжьым къыщыхагъэщыгъ бзэджэшIа­гъэ зезыхьагъэхэм нэмыкI чIыпIэхэм къарыкIыгъэхэр мымакIэу зэрахэтхэр. ГущыIэм пае, Александр Сысовым къы­Iуагъ Тэхъутэмыкъое районым зыныбжь имыкъугъэхэм щызэрахьэгъэ бзэджэшIагъэхэм янахьыбэр гъунэгъу Краснодар краим къикIыгъэхэм «зэря­IэшIагъэхэр». НэмыкI районхэми ащ фэдэхэр ащагъэунэфых. Уголовнэ пшъэ­дэкIыжь зэрагъэхьырэ нэбгыри 155-м щыщэу 139-р ары Адыгеим щыщыр.

Зыныбжь имыкъугъэу бзэджэшIагъэ зезыхьэхэрэм япчъагъэ нахь макIэ хъуным фэшI Iофэу зэшIуахыхэрэр Алексей Петрусенкэм идоклад къыщыхи­гъэщыгъэх. ШIагъэ хъугъэр мымакIэу ащ къыIуагъэми, бзэджэшIагъэ зезыхьэ­хэрэм ащыщыбэр «хымэми», узыгъэгу­мэкIыныбэ джыри зэрэщыIэр, унагъори, еджапIэри, милициери, хабзэри, зэ­деIэжьыхэзэ мы Iофыгъом ­дэлэжьэнхэ зэрэфаем Премьер-министрэм игуа­дзэ къыкIигъэтхъыгъ. БзэджэшIагъэ зезыхьэрэ пшъэшъэжъыехэм япчъагъэ зэрэхэхъуагъэр куоу узэгупшысэн, лъэшэу Iоф зыдэпшIэн фэе Iофыгъоу зэрэщытыр ащ къыIуагъ.

АР-м шIэныгъэмрэ гъэсэныгъэм­рэ­кIэ и Министерствэ зэшIуихышъу­гъэ­хэм ащигъэгъозагъэх министрэм игуа­дзэу Алый Марыет. Ащ идоклад ыуж Хьакурынэхьаблэ дэт еджэпIэ-интернатым иIофыгъохэм, анахьэу зыныбжь имыкъугъэу ащ щаIыгъхэм загъэбы­лъэу зэрэхэхьажьыхэрэм, бзэджэшIа­гъэхэр зэрэзэрахьэхэрэм, игъэкIотыгъэу тегу­щы­Iагъэх. КIэлэцIыкIухэр ащ зэрэ­чIэ­мызагъэхэрэм ушъхьагъу шъхьаIэу иIэр, зимысагъэ хэлъыр зэхэпфынышъ, узэдеIэзэ щыкIагъэхэм ядэгъэзыжьын узэрэдэлэжьэн фаер Президентым къыхигъэщыгъ.

Мыекъопэ районымкIэ Iофхэм язытет къытегущыIагъ ащ иадминистрацие ипащэ игуадзэу Ирина Храмовар, Кощхьэблэ районым мы лъэныкъомкIэ щыкъэбархэм ащигъэгъозагъэх ащ ­иадминистрацие ипащэу Тхьаркъохъо Налбый.

Зыныбжь имыкъугъэхэм алъэныкъо­кIэ районым Iофыгъуабэ зэрэщыряIэр Ирина Храмовам шъхьэихыгъэу къы­Iуагъ, зэхэсыгъом хэлажьэхэрэм яуп­чIэхэри мымакIэу къызэкIэлъыкIуагъэх. Правительствэм ипащэ иеплъыкIэхэр къыриIотыкIыхэзэ, Мыекъопэ район администрацием спортымрэ ныбжьыкIэ IофхэмрэкIэ и ГъэIорышIапIэ иIофшIа­кIэ уигъэрэзэнэу зэрэщымытыр, ар пчъа­гъэхэм къызэраушыхьатырэр къыхигъэщыгъ. Зыныбжь имыкъугъэу райо­ным исхэм мыхэм Iоф зэрадашIэ-
рэм мэхьанэ ин зэриIэм, япшъэрылъхэр икъоу агъэцакIэхэмэ шIуагъэ къызэ­ри­тыщтым къыкIигъэтхъыгъ. Федеральнэ программэхэм къыдалъытэхэрэр гъэцэ­кIагъэ зэрэхъухэрэм фэдэу районми программэхэр иIэхэу, ахэр щыIэныгъэм щыпхыращыхэмэ Iофхэм язытет на­хьышIу зэрэхъущтыр республикэм ипащэ къыIуагъ, пстэуми яIофшIэн агъэ­лъэшынышъ мы Iофыгъом идэгъэзыжьын дэлэжьэнхэу къафигъэпытагъ.

ХЪУТ Нэфсэт.

Сурэтыр А. Гусевым тырихыгъ.