Мыекъуапэ футболымкIэ икIымэфэ зэнэкъокъухэр щылэ мазэм и 31-м аухыгъэх. ЯтIонэрэ ыкIи ящэнэрэ купхэм ахэт командэхэм язэIукIэгъухэр зыхьыщтхэр къэшIэгъоягъэх.

ЯтIонэрэ купым щызэнэкъо­къугъэ командэхэм якIэух ешIэ­гъухэр зэраухыгъэхэр:

«Радуга» - УВД - 1:3, «Картонтарэр» - «Звезда» - 4:0, МГГТК - «Спортма­стер»  - 2:5, «Квант» - «Спортмастер-2» - 2:1, «Газпром» - «Кавказ» - 2:1, «Зарем» - «Джокер» - 6:6.

УВД-м аужрэ ешIэгъум дэгъоу зыфигъэхьазырыгъ. ТекIо­ныгъэр 3:1-у къызэрэдихыгъэм ишIуагъэ­кIэ ятIонэрэ купым ­апэрэ чIыпIэр къыщыфагъэ­шъошагъ. «Спортмастерыр» зы очко ныIэп УВД-м ыуж къызэринэщтыгъэр. МГГТК-м истудентхэмрэ «Спортмастерымрэ» гъэшIэгъонэу зэдешIагъэх. УВД-р ятIонэрэ купым чемпион зэрэщыхъугъэр «Спортмастерым» ифутболистмэ ашIэщты­гъэми, МГГТК-м зэIукIэгъур къы­шIуамыхьы мыхъущтэу алъы­тэщтыгъ. МГГТК-м текIо­ны­гъэр къызихьыкIэ ящэнэрэ чIыпIэм нэс дэкIоен ылъэкIы­щтыгъ. Сыдэу хъугъэми, «Спортмастерыр» зэкIэкIонэу фэягъэп, МГГТК-м текIуагъ.

УВД-м ифутболистмэ гущы­Iэгъу тафэхъугъ. Зэнэкъокъумэ ясудья шъхьаIэу Пэнэшъу Мыхьамодэ къызэрэхигъэщыгъэу, УВД-р апэрэ ешIэгъухэм къаще­гъэжьагъэу, купым текIоныгъэр къыщыдэхыгъэным фэбэнагъ. Тренерхэу Алексей Плискинымрэ Сергей Денделеевичрэ командэ дэгъу зэхащагъ.

Пэхъу Зауррэ Армен Акопянрэ УВД-м икъэлэпчъэIутых. ЕшIакIохэр: Хьэшъхьэнэкъо Алый - ар командэм икапитан, Фарманян Масис, Тарасян Роман, Лэужъ Арамбый, Шымы­гъэхъу Рустам, Тэкъу Аскэр, Ешыгоо Мурат, Къоджэ Рус­лъан, Шэуджэн Айдэмыр, Пщыдатэкъо Руслъан.

Апшъэрэ купым УВД-р ыкIи «Спортмастерыр» зэрэхэхьагъэхэм фэшI тафэгушIо. УВД-м ифутболистмэ тызэрэщагъэгъозагъэу, физкультурэмрэ спортымрэ апыщагъэмэ япчъагъэ хэхъо. Къулыкъур дэгъоу ахьыным фэшI спортым шIуагъэ къафехьы. Ап­шъэрэ купым зэрэщешIэ­щтхэ шIы­кIэм мы уахътэм егупшысэх.

Ящэнэрэ купым командэ 22-рэ щызэнэкъокъугъ. Финалныкъом хэфагъэхэр шэмбэтым зэдешIа­гъэх. «Старт» - «Адыгея-
Ла­да» - 2:0, «Ханскэр» - «Урожай-2»-р - 1:4. Финалым «Стартыр» 3:2-у «Урожай-2»-м щытекIуи, ящэнэрэ купым апэрэ чIыпIэр къыщыдихыгъ. «Адыгея-Ладэм» ящэнэрэ чIы­пIэр фагъэшъошагъ. «Ханскэм» финалныкъор зэрэ­шIуахьыгъэм фэшI ящэнэрэ чIы­пIэм пае ешIэ­жьыгъэп.

- Илъэс 30 фэдиз хъугъэу кIы­мэфэ зэнэкъокъумэ сахэла­жьэ, - еIо «Урожай-2»-м икъэ­лэпчъэIутэу Мэрзэкъэнэ Нур-
бый. - ЗэхэщакIомэ, судья  шъхьаIэу Пэнэшъу Мыхьамодэ лъэшэу тафэраз.

ЧIыпIэу къыдахыгъэхэр

ЯтIонэрэ купым щешIагъэхэр, очко пчъагъэу рагъэкъугъэр:

1. УВД - 27

2. «Спортмастер»  - 26

3. «Картонтарэр»  - 22

4. МГГТК  - 20

5. «Джокер»  - 16

6. «Кавказ»  - 14

7. «Звезда»  - 13

8. «Квант»  - 13

9. «Газпром»  - 12

10. «Спортмастер-2» - 11

11. «Радуга» - 8

12.  «Зарем»  - 6.

КIымэфэ зэнэкъокъухэм афэ­гъэхьыгъэ пчыхьэзэхахьэ Мые­къуапэ щыкIонэу щытышъ, зэфэхьысыжьхэр игъэкIотыгъэу тшIынхэу уахътэ тиIэщт.