«Динамо» Мыекъуапэ - «Десна» Брянск - 85:61 (23:11, 18:21, 22:15, 22:14).

Щылэ мазэм и 30-м Мыекъуапэ щызэдешIагъэх.

Зезыщагъэхэр: И. Еремин - Ставрополь, С. Удовицкий - Таганрог, Ю. Назаренко - Краснодар.

«Динамэм» щешIагъэхэмрэ очко пчъагъэу къахьыгъэм­рэ: Барсуков - 6, Пепеляев - 23, Хмара - 8, Ива-
нов - 10, Долгополов - 4, Тыу - 12, Гапошин - 11, Блэгъожъ - 0, Степанов - 0, Мэрэтыкъу - 4, Хьа­къун - 7.

Апшъэрэ купым хэт командэхэр тIоу гощыгъэх. Апэрэ чIы­пIиплIыр купхэм къащыдэзыхыхэрэр финалым щызэдешIэщтых. Мыекъопэ «Динамэм» апшъэрэ купэу «А»-м ятфэнэрэ чIыпIэр щиIыгъэу «Деснэм» IукIагъ. Брянскэ икомандэ япшIэнэрэ чIыпIэм щыIэу Мыекъуапэ къэ­кIуагъ.

Зэхэщэн Iофхэр ешIапIэм дэгъоу щагъэцакIэзэ, Сергей Барсуковыр, Сергей Ивановыр ти­спортсменхэм щысэ афэхъу­щтыгъэх. Алексей Пепеляевыр очкоуищ дзыгъохэр дэгъоу зы­гъэцакIэрэмэ ахалъытэ, ау а ма­фэм гъэхъагъэ зэришIыгъэр тазыр дзынхэмрэ, 9-м щыщэу 8-р хъурджанэм ригъэфагъ, очкоуи 2 дзынхэмрэ, дзыгъуи 8-м щыщэу 6 хъурджанэм ридзагъ. Очкоуищ дзыгъохэр гъогогъуи 6 зегъэца­кIэм зэ ныIэп хъагъэм зэрэри­дзагъэр. Нахь зыфэIазэу къы­щы­хъурэр къыдэмыхъу зэхъум нэмыкI хэкIыпIэмэ Алексей Пепеляевыр зэрягупшысагъэр, тренер шъхьаIэу Андрей Синельниковым къыфишIыгъэ пшъэрылъхэр зэригъэцакIэхэрэр тиеплъы­кIэхэм къахэтэгъэщых.

Очкоуищ дзыгъо 32-м щыщэу 11-р «Динамэм» хъагъэм ридзагъ - ар бэп. Тыу Георгий, Артем Гапошиныр, Илья Хмарэ нахь къахэщыгъэх. Очкоуищ дзыгъо 19-м щыщэу 8-р хьакIэмэ хъа­гъэм радзагъ.

«Деснэм» дэгъоу щешIагъэх Алексей Бутылинымрэ Алексей Шалыгинымрэ - очко 34-рэ якомандэ къыфахьыгъ. Хьа-
кIэмэ ешIэгъум текIоныгъэр къызэрэщыдамыхыщтыр пшIэнэу щытыгъ. «Динамэр» «Деснэм» нахь дэгъоу ешIэщтыгъ. Хьа­къунэ Руслъан, Мэрэтыкъо Тимур, Александр Степановыр, Блэ­гъожъ Къэплъан, Артем Гапошиныр тибаскетболист ныбжьыкIэх, тапэкIэ нахь зыкъызэIуахынэу амалышIухэр яIэх.

ЯтIонэрэ  ешIэгъур «Динамо» - «Десна» - 80:69 (15:14, 22:19, 28:16, 15:20).

«Динамо»: Барсуков - 9, Пепеляев - 4, Хмара - 16, Иванов - 19, Долгополов - 6, Тыу - 7, Гапошин - 6, Блэгъожъ - 1, Кубанский - 0, Степанов - 0, Мэрэтыкъу - 0, Хьакъун - 12.

ЯтIонэрэ ешIэгъум хьакIэмэ текIоныгъэр къыщыдахы ашIои­гъуагъ. Ары шъхьае, «Динамэм» зы очко нэмыIэми чIинэ хъунэу щытыгъэп. ХьакIэмэ очкоуищ дзыгъохэр дэеу агъэцэкIагъэх - 13-м щыщэу 2 ныIэп хъагъэм радзагъэр. «Динамэм» дзыгъо 25-м щыщэу 9-р хъурджанэм ри­дзагъ.

Сергей Ивановыр такъикъ 30 ешIагъ, очко 19 ригъэкъугъ. Хьа­къунэ Руслъан такъикъ 24-рэ, Артем Гапошиныр 21-рэ, Илья Хмарэ 22-рэ, Андрей Долгополовыр 20 ешIагъэх. ЗэкIэ коман-
дэм хэт баскетболистхэр тренер шъхьаIэу Андрей Синельниковым ешIапIэм къыригъэхьагъэх. АщкIэ къатIомэ тшIоигъор «Динамэр» «Деснэм» дешIэзэ, зичэзыу зэIукIэгъумэ зызэрафи­гъэ­хьа­зырыгъэр ары.

Мэзаем и 2 - 3-м «Динамэр» къалэу Орел икомандэ Мые­къуапэ щыдешIэщт.