Адыгэ Республикэм и Президент ишIухьафтынэу журна­листикэм ылъэныкъокIэ ыгъэнэфагъэр 2009-рэ илъэсым къэзылэжьыгъэхэм яетыжьын фэгъэхьыгъэ тор­жественнэ зэхахьэр тыгъуасэ Президентым дэжь щыкIуагъ.

2008-рэ илъэсым мэлылъфэгъум и 30-м мы лъэныкъом фэгъэхьыгъэ Указэу къыдэкIыгъэм Президентым иуна­шъокIэ икIыгъэ илъэсым зэхъокIыны­гъэхэр фашIыгъэх. Ахъщэ шIухьафтыныр джы лъэныкъуитIукIэ агощэу рагъэ­жьагъ. Мин 50-у агъэнэфэгъагъэр фэди­тIукIэ нахьыбэ хъугъэ. Гъэзетым къыхаутыхэрэм шъхьафэу уасэ афашIы, теле- ыкIи радиопрограммэхэр хэушъхьэ­фы­кIыгъэу къыхагъэщых. Шъхьэихыгъэ шIыкIэм тетэу зэхащэрэ зэнэкъокъум социальнэ-экономическэ, общественнэ-­политическэ, нэмыкI бгъухэр къизыIоты­кIырэ журналист IофшIэгъэ анахь дэ­гъухэм Президентым ишIухьафтын афа­гъэшъуашэ.

Мыгъэ АР-м и Президент ишIухьафтын (гъэзетым къихьагъэхэмкIэ) зыфа­гъэшъошагъэр республикэ гъэзетэу ­«Адыгэ макъэм» иредактор шъхьаIэу Дэрбэ Тимур ары. Рубрикэу «ЗыкIыны­гъэм екIурэ гъогу» зыфиIорэ тхыгъэхэу гъэзетым ащ къыригъэхьагъэхэм комиссием хэтхэм осэшхо фашIыгъ, АР-м и Президенти ахэм адыригъэштагъ.

Федеральнэ къэралыгъо унитарнэ предприятиеу «Урысые къэралыгъо телевизионнэ ыкIи радиовещательнэ компаниер» зыфиIорэм икъутамэу телерадиокомпаниеу «Адыгеим» ихэушъхьафыкIыгъэ ­корреспондентэу Виктор Крючковымрэ ­телерадиокомпаниеу «Адыгеим» ире­жиссерэу Юрий Григоренкэмрэ къагъэхьазырыгъэ телекъэтын заулэу «Без дна» зыцIэм зэнэкъокъум текIоныгъэр къыщыдихыгъ.

Джащ фэдэу гъэзетэу «Советскэ Адыге­им» иотдел ипащэу Валерия Ло­мешинам, телерадиокомпаниеу «Адыгеим» иIофышIэхэу ТIэшъу Светланэ, Дэгуф Фатимэ, ЕхъулIэ Мэдинэ, Александр Никоновым рэзэныгъэ тхылъхэмрэ ахъщэ шIухьафтынхэмрэ афагъэшъо­шагъэх.

Зэнэкъокъум хэлэжьагъэхэм ыкIи ащ текIоныгъэ къыщыдэзыхыгъэхэм зэкIэми АР-м и Президентэу ТхьакIущынэ Аслъан къафэгушIуагъ. Непэ Адыгеим иэкономикэ хэхъоныгъэу ышIыхэрэм журналистхэм яIахьышIу зэрэхэлъыр, шъыпкъа­гъэ зыхэлъ къэбарыр цIыфхэм алъыгъэIэсы­гъэнымкIэ СМИ-хэм яIофшIэн мэхьанэ­шхо зэриIэр ыкIи илъэс зэкIэлъыкIохэм къакIоцI зэгурыIоныгъэ азыфагу илъэу зэрэзэдэлажьэхэрэм афэшI ахэм зэра­фэразэр республикэм ипащэ къыIуагъ. Ятворческэ гъэхъагъэхэм къащымыкIэу, Адыгеим имызакъоу зэрэ Урысыеуи щы­зэлъашIэрэ журналист цIэрыIо хъунхэу къызэрэугъоигъэхэм ТхьакIущынэ Ас­лъан къафэлъэIуагъ.

Сыд фэдэрэ лъэныкъокIи IэпыIэгъу къа­фэхъурэ Президентым зэрэфэразэхэр, пащэм цыхьэу къафишIыгъэр къа­гъэшъыпкъэжьыным тапэкIи Iоф зэрэдашIэщтыр нэужым гущыIэ зыштэгъэ журналистхэм къаIуагъ. Республикэм ипащэ игъусэхэу нэпэеплъ сурэт зытырарагъэхыгъ.

ТХЬАРКЪОХЪО Адам.

Сурэтыр А. Гусевым тырихыгъ.