Адыгэ Республикэм и Къэралыгъо филармоние исимфоническэ оркестрэ иконцертэу Мыекъуапэ щыкIуагъэм хэлэжьагъ Дунэе фестивальхэм щытхъуцIэхэр къащыдэзыхыгъэ КIыкI Софэ. Санкт-Петербург и Къэралыгъо консерваторие ия 5-рэ курс ар щеджэ.

Классикэм хэхьэгъэ произведениехэу Моцарт, Глинкэ, Дворжак, Дунаевскэм, нэмыкIхэми аусыгъэхэр симфоническэ оркестрэм къыригъэIуагъэх. Урысыем изаслуженнэ артистэу Петр Шаховыр оркестрэм идирижер шъхьаI. Концертыр музыковедэу Мария Громовам зэрищагъ.

Оперэу «Руслъанрэ Людмилэрэ» зыфиIоу Глинкэ ыусыгъэм къыхэхыгъэ ариер, Моцарт, нэмыкI композитормэ япроиз­ведениехэр КIыкI Софэ къы­Iуагъэх. Артисткэм мэкъэ Iэ­тыгъэкIэ тигъэгушIуагъ, цIэрыIо хъун зэрилъэкIыщтыр концертым къыщылъэгъуагъ.

КIыкI Софэ искусствэхэмкIэ Адыгэ республикэ колледжыр къыухыгъ, Санкт-Петербург щеджэ, Iоф щешIэ, Адыгэ Республикэм иныбжьыкIэмэ Iэпы­Iэгъу язытырэ фондэу «Гуфэсым» илауреат. Санкт-Петербург тилъэпкъэгъоу дэсхэм щызэхащэгъэ Адыгэ Хасэм ипчыхьэзэхахьэмэ чанэу ахэлажьэ. КIыкI Софэ Мыекъуапэ къызэкIом
АР-м культурэмкIэ иминистрэу Чэмышъо Гъазый ригъэблагъи, зэдэгущыIэгъу зэдыряIагъ.

Филармонием щыкIогъэ концертым АР-м культурэмкIэ иминистрэу Чэмышъо Гъазый, ащ иIофшIэгъухэр, искусствэр зикIасэхэр ашIогъэшIэгъонэу еплъыгъэх. Пчыхьэзэхахьэм
С. КIыкIым къыщиIогъэ орэдмэ ащыщ Къулэ Амэрбый ыусы­гъэри. Концертыр къызаухым,
А. Къулэр пчэгум къихьи
С. КIыкIым гущыIэ фабэхэр фиIуагъэх, ымакъэ дунаим щыжъынчынэу фэлъэIуагъ.

КIыкI Софэ дэтшIыгъэ зэдэ­гущыIэгъур «Адыгэ макъэм» къыхиутыщт.

Сурэтым итыр: КIыкI Софэ концертым хэлажьэ.