Теуцожь районым чIы­гум дэлэжьэнэу къихьэгъэ инвесторэу джырэ нэс итыгъэр плIы: агрофир-мэхэу «Киево-Жураки», «Синдико-Агро», «Аскъэлай» ыкIи «Рив-Агро» зыфиIохэрэр арых. Джыри ахэм зы къахэхъуагъ. Ащ зэреджагъэхэр ООО-у «Адыгейское».

- Ипащэр опытышхо зиIэ чIыгулэжьэу, тигъунэгъу краими щыцIэрыIо зэхэщэкIо бэлахьэу, Шъхьа­щэфыжь икIэлэ пIугъэу Курыжъо Аслъан ары, - еIо районым мэ­къу-мэщымкIэ и ГъэIо­рышIапIэ ипащэу Пщы­датэкъо Сулейман. - Ар районым къызихьагъэр илъэсэу дгъэкIотэжьы­гъэм ыкIэмэ адэжь. Ас­къэлае, Пэнэжьыкъуае ыкIи Очэпщые ащыпсэу-рэ къоджэдэсхэм ячIыгу Iахьхэр арых ылэжьынхэу аIихыгъэхэр. Зэрязэгъы­гъэр чIыгу Iахь пэпчъ лэжьыгъэ килограмм 500, тыгъэгъэзэ дэгъэ литрэ 20 аритынэу ары. Дэгъоуи IофшIэныр ригъэжьагъ.

Ар тэри нэрылъэгъу къытфэхъугъ. ИлъэсыкIэу тызхэхьагъэр къихьанкIэ мэфэ заулэ нахь къэмынагъэу Аскъэлае тыкIозэ, ом изытет мыхъэтагъэми, тракторышхо заулэ зэуж итхэу зэрэжъохэрэр тлъэ­гъугъагъэ. Къэдгъэзэ­жьыгъэу Пэнэжьыкъое бензинигъэхъуапIэм тыкъызыIохьажьым, ащ пэчIынатIэу щылъ хьэсэшхоу илъэс пчъагъэ хъугъэу тэрэзэу зыдэмылажьэхэрэр шIуцIэрымэр тырихэу куоу зэрэжъо­гъахэр тинэплъэгъу къыридзагъ. Ащ къыхэкIы­жьыгъэхэ трактор кIочIэ­шхохэу «К-700»-хэр заводым къыдэкIыгъакIэхэм фэдэхэу къыпэIулъ хьэсэшхом зэрэхахьэхэрэр дгъэшIагъо икъугъ.

Ащ фэдэу тракторыбэ зэхэтэу, зэдырагъаштэу, гъэстыныпхъэр къезы­щэкIырэ автомашинэри, нэмыкIэу ящыкIагъэ-
хэри акIыгъоу бэшIагъэу тапэ къифагъэпти, ащ тыкIэупчIэнэу районым иадминистрацие ища-
гу тыдэхьагъ. Районым иIэшъхьэтетэу Хъут Теуцожьэу ащ тызщыIу­кIагъэм къытиIогъагъ чIыгу гектар минитфым ехъу язгъэлэжьын зыгу хэлъ кIалэу Курыжъо Аслъанэу къафэкIуагъэм тракторипшIэу къыфы­гъэхэм чэщи мафи ямыIэу Iоф зэрашIэрэр, ахэм зэращыгушIукIырэр.

Ар зыхъугъагъэм ыуж мэзэ Iэпэ-цыпэ тешIэ­жьыгъэу а уахътэм къы­кIоцI ахэм Iофэу ашIагъэр зыфэдэм тащегъэгъуазэ Пщыдатэкъо Сулейман.

- ЫпшъэкIэ зигугъу къэтшIыгъэ чылагъохэм адэсхэм ячIыгу Iахьэу къаIахыгъахэр гектар минитIу фэдиз мэхъу. Ахэр бэшIагъэу амылэжьыгъэхэу, чIыгукIэм фэдэ хъужьыгъагъэхэми, охътэ кIэкIым къыкIоцI гектар 1900-рэ къэрсэбанэу къа­Iэтыгъах. ТракторипшIыр зэхэтэу, шIуцIэрымэр зытырихырэ жъогъэ бзы­гъэшхохэр къызэрагъэ-тIы­лъэкIыхэзэ жъохэ зы­хъукIэ, гур къагъатхъэ.

Корр.: Чэщ-зымафэм тхьапша къажъорэр?

П.С.: Къемыщхэу, шы­нэгъакIэм ымыгъэохъу­хэмэ, къэуцу яIэп. Анахь макIэми, гектаришъэм къыщымыкIэу жъогъахэу яIэм мафэ къэс къыха­гъахъо.

Корр.: А чIыгу гектар минитIур ара ылэжьы­щтыр, хьауми джыри фыхэжъугъэхъощта?

П.С.: Фыхэмыгъахъоми къыпшIокIыщтэп. Ар пхъашэу лэжьэн зыгу хэлъ кIал. Цыхьэ зыфэпшIын лэжьакIоуи щыт. Ащ ишыхьат Курыжъо Ас­лъан илэжьакIэ фэгъэ­хьыгъэ тхыгъэхэу журнал зэфэшъхьафхэм къары­хьагъэхэу къытIэкIахьэ­хэрэр. Джары тэри ащ тыфэчэфэу районым чIы­гоу къинагъэу тымылэ­жьырэр зэкIэ фэдгъэзэнэу зыкIитхъухьагъэр. Къызэ­рэтлъытэрэмкIэ, пстэум­кIи гектар 5500-рэ фэ­гъэзагъэ хъунэу ары. Къы­зэрэсIуагъэу, гектар минитIу фэдизыр етты­гъах. Джыри гектар
3500-рэ фыхэдгъэхъощт. Ахэр ПчыхьалIыкъуае ыкIи былымгъэпщэрыпIэ хъызмэтшIапIэщтыгъэу Чэтыукъо дэтыщтыгъэм алъэныкъокIэ щыIэхэр арых.

Корр.: Арэу зыхъукIэ, зыми фэмыгъэзагъэу, амылэжьэу чIыгу рай­оным зи къинэжьырэба?

П.С.: Къинэжьырэп. Районым тыжъоу, лэжьы­гъэшIапIэу илъыр жъо­кIупIэ гектар мин 26-рэ. Бжыхьасэу хэтлъхьагъэу тиIэр гектар 10851-рэ. Къэрсэбанэу къэтIэтынэу щытыр гектар 8100-рэ. Люцернэпкъхэри гектар миным ехъух. Арышъ, тымылэжьэу къэнэжьы­гъагъэр джа Курыжъо Аслъан фэдгъэзэжьырэ гектар мин зытфыхыр ары.